“Dədə Qorqud” Fondunun İdarə Heyətinin və “Azərbaycan Dünyası” beynəlxalq jurnalının rəhbərliyi və əməkdaşlarının Azərbaycanın füsunkar bölgəsi Zaqatalaya səfəri.

Azərbaycan Dünyası beynəlxalq jurnalının İdarə Heyəti və əməkdaşları Azərbaycanın ən füsunkar guşələrindən biri – qədim tarixə və zəngin mədəniyyətə malik Zaqatalaya səfər etmişlər. Bu bölgə əsrlər boyu müxtəlif millətlərin və xalqların mehribanlıq, qardaşlıq və qarşılıqlı hörmət şəraitində yaşadığı bir diyar kimi tanınır. Zaqatala yalnız təbiəti ilə deyil, həm də tolerantlığı, birliyi və dostluğu ilə seçilir.

Səfərin ilk ünvanı rayonun icra başçısı Mübariz müəllim Əhmədzadə ilə görüş oldu. Hörmətli başçı qonaqlara rayonun inkişafı, sosial və mədəni həyatı barədə ətraflı məlumat verdi. Ardınca bölgənin mədəniyyət ocaqlarından biri – Heydər Əliyev Mərkəzi ilə tanışlıq həyata keçirildi. Mərkəzin direktoru buradakı zəngin fəaliyyət istiqamətlərini, gənclər üçün yaradılan imkanları təqdim etdi. Bu mərkəz maarifləndirici tədbirləri, incəsənət dərnəkləri və təlimləri ilə gənc nəslin inkişafına xidmət edən əsl mədəniyyət məbədi kimi dəyərlidir.

Səfərin mühüm məqamlarından biri də Zaqatala Tarix-Diyarşünaslıq Muzeyinə edilən ziyarət oldu. Muzeyin direktoru Səfər Ramazanov qonaqları səmimiyyətlə qarşıladı, zəngin eksponatlar və tarixi irsimiz barədə maraqlı məlumatlar verdi. Görüşdə “Dədə Qorqud” Fondu tərəfindən “Qızıl Ürək” mükafatına layiq görülən şair-publisist Nəbi Mülkümov, “Azərbaycan Dünyası” beynəlxalq jurnalının Qax, Zaqatala və Balakən nümayəndəsi və Fondun İdarə Heyətinin üzvü Məmmədxan Hacıyev və tarixçi Aydın Babayev də iştirak edirdilər. Onların dəyərli fikirləri, bölgənin tarixi irsinə dair açıqlamaları səfəri daha da maraqlı etdi. Bu görüş Zaqatalanın qədim tarixinin qorunması və gələcək nəsillərə ötürülməsi baxımından böyük əhəmiyyət daşıyırdı.

Bundan əlavə, səfər çərçivəsində jurnal heyəti Yeni Azərbaycan Partiyası (YAP) Zaqatala rayon təşkilatına da qonaq oldu. Burada rayon YAP təşkilatının sədr müavini Qutbiddin Qardaşov və Ağsaqqallar Şurasının sədr müavini Tahir Məmmədov ilə səmərəli görüş keçirildi. Söhbət zamanı ölkəmizin ictimai-siyasi həyatında YAP-ın oynadığı rol, partiyanın bölgədə həyata keçirdiyi layihələr və ictimai təşəbbüslər barədə ətraflı müzakirələr aparıldı. Görüşün YAP-a məxsus binada baş tutması həm də partiyanın yerli təşkilatının ictimaiyyətlə fəal işini, vətəndaşlarla açıq dialoqa hazır olduğunu göstərirdi. Bu görüş, jurnal nümayəndələri üçün Zaqatalanın ictimai-siyasi mühitinə yaxından nəzər salmaq baxımından olduqca əhəmiyyətli idi.

Səfər çərçivəsində jurnal əməkdaşları həmçinin Zaqatalanın təbiət inciləri ilə də tanış oldular. Yaşıllıqlara bürünmüş səfalı guşələr, saf havası və füsunkar mənzərələri ilə seçilən bu torpaq insan ruhunu təzələyir. Suvagil kəndində gördüyümüz axar bulaq Yeni Suvagil kənd artezyani isə təbiətin ilahi möcüzəsini xatırladırdı. Qədim dağların qoynundan, yerin dərinliklərindən doğularaq kəndin mərkəzinə çıxan bu bulaq həm sakinlərə, həm də gələn qonaqlara həyat, təmizlik və fərəh bəxş edir. Onun sərinliyi və şəffaflığı Zaqatalanın təmizliyini, saflığını simvolizə edirdi.

Bundan başqa, Zaqatala qədim qalaları, məscidləri, kilsələri və tarixi abidələri ilə də diqqət çəkir. Burada müxtəlif xalqların mədəniyyətləri yanaşı yaşayır, ənənələri qorunub saxlanılır və hər kəs özünü doğma bir mühitin parçası kimi hiss edir. Bu səbəbdəndir ki, Zaqatala təkcə təbiəti ilə deyil, həm də ictimai-mədəni zənginliyi ilə Azərbaycanın çoxmillətli harmoniyasını parlaq şəkildə nümayiş etdirir.

Beləliklə, bu səfər Azərbaycan Dünyası beynəlxalq jurnalının əməkdaşları üçün həm mənəvi zənginlik, həm də Vətənimizin füsunkar təbiətini, qədim irsini, multikultural dəyərlərini və ictimai-siyasi mühitini daha yaxından dərk etmək imkanı oldu.